Ex Undecimo

Ex tribus epicycli locis in Iove observatis, eccentricitatem et augem per coniecturam elicit, sicut in Marte fecerat. 172 Et rursus ex auge et eccentricitate rectificatis intervallis, certiorem ac vero propriorem reddit augis et eccentricitatis notitiam. Deinde in aliqua trium observationum elicit geometrice, locum medium Iovis et argumentum medium in epicyclo. Item proportionem semidiametri epicycli ad semidiametrum eccentrici ex alia observatione. 173 Post haec ex nova observatione motus rectificat tam longitudinis, quam diversitatis. Et radices constituit. Hic completis, eadem singula pro Saturno facit. Hoc est ex tribus epicycli locis sciscitatur eccentricitatem et augem. Ex his intervalla rectificat et opus repetit. In una trium observationum, medios motus longitudinis et argumenti scrutatur. 174 Semidiametrorum epicycli et eccentrici proportionem determinat. Denique ex nova observatione motus longitudinis ac diversitatis rectificat. Quamquam, si motus longitudinis a motu Solis auferatur, superest in singulis tribus superioribus planetis motus diversitatis. 175 Inde radices ad aeram consuetam sicut in coeteri, ponit. In fine, suppositis mediis motibus, aequationes geometrice metitur, et veros motus supputat. Unde aequationum tabulae et emendari et instau[A:41r]rari possunt. 176 Sed aequationes⁶³ argumenti scribuntur in tabulis epicyclo in longitudine media constituto, pro coeteris sitibus minuuntur et augentur per minuta proportionalia. Quae omnia per scientiam planorum triangulorum peraguntur. Notandum etiam quod deferentes, cum aequantibus et epicyclis et ecliptica, in eodem plano describuntur et intelliguntur. In his observationibus, facilitatis gratia, nec motus latitudinum diversitatem sensibiliter iugerunt.